1Th 5 | MMX | STEP | Luvutnetak mi luvurinuk. Nema ma noxo tong i rinimi at ua laaleng ne Iesu nabamlong teren.

1 Thessalonians 5

Lagagas Alii Ti Lomlong At Leeme Silok

1 Luvutnetak mi luvurinuk. Nema ma noxo tong i rinimi at ua laaleng ne Iesu nabamlong teren. 2 Mila mi xasep tinotno do mo laaleng naba rupot ngan laradi xipkip pilo i rupot at laxanimin. 3 Dola limixin dina lok keretna, “Limila ik lok at na lavatbung menemen; lanmarat kopmen nak lok de,” losongsongot silok ba vot saparap limixin at na lavatbung menemen. Mo laaleng naba rupot soso mun; naba lok ngan mo losongsongot it pot at latkin i suma lamdak. La kopmen tara noxo epovo na sixiro basinge i.

4 Ketla nemi luvutnetak mi luvurinuk, mi noxo rakdu ap mo laaleng ngan laradi xipkip pilo i lox arakdu limixin; atla kopmen minak lok at lamain. 5 Nemi axap mik lok at laxasep at ne Moroa. I lok ngan ta do mi nemen at laaleng kangking la levempanga i xasep. 6 Kuren la nemen dik guta vunga xerekngan limixin kopmen dina nuunu at ne Iesu; ketla ata gagas avukat la nemen dik guta nemen tangtangku. 7 Mila nedi di vunga la di inin tangtangku, di nemen at lamain. 8 Ketla nedik limixin at laxasep, atam tebeng lodoxoma nunuan la ata umsu mi lunuunu mi labalamu, i lok ngan lavatban tik lok pe laxakapmek. La ata lok ka lodoxoma voovo ri loklox arooro at ne Moroa. Na lodoxoma i lok ngan lavatkiam ti lok tooro nedik at lorooro atdik. 9 Moroa xopmen goxo soxolik ka nedik kusu tana ekip tangarang mi lebelemamao ren; ketla neni ga soxolik ka dik kusu taba lok kaka loklox arooro at Leeme Silok, ne Iesu Karisito. 10 Ni ga met kusu dik taba nemen eburu min. Do nedik taga met pam kopla move taba rooro se at lomlong teren, tanaba nemen amisik eburu min. 11 Kuren la mina elok tooro ela mi na levelinga la mina lox alolos lorooro atnimi ngan migara lok pam i.

Lavapaase Loklox Axap

12 Luvutnetak mi luvurinuk. Ma sing nimi dola mina lok ngangao atnedi limixin, Leeme Silok gara soxolik ka vam di xusu dinam gomgo rinimi at lotu. Nedi di lok tatao lorooro atnimi la di lox ase nimi mi levelinga at Leeme Silok. 13 La mina balamu aleng di mila di gugu at lugugu at ne Moroa. La mina umsu mi limila at lixitkis atnimi.

14 Luvutnetak mi luvurinuk. Ma tong i rinimi do mina paase alolos nedi dik molo. La mina paase tooro nedi dik marat soso. La mina lok tooro nedi lunuunu atdi xopmen na lolos, la minat kis mulus mi limixin axap. 15 Nemen gat tara guta vorang laxakapmek mi laxakapmek. Ketla mina lolos amisik kusu mina lox asuusu loklox anare kantubu atnimi la limixin petpes bok.

16 Minak lok momo amisik. 17 Mina ngising amisik saparap ne Moroa. 18 Mina tong avukat ti ne Moroa at levempanga axap. At lorooro atnemi mi nuunu at ne Iesu Karisito, mina lok na levempanga mila ne Moroa i vara i.

19 Nemen mita ru pe lugugu at Loroonan Kaala. 20 Nemen mitang tonga xepe levelinga atnedi di vavang tinimi. 21 La mina lok tong pen levempapaase maxat; minam tebeng lolos mo levelinga i lox avukat 22 la mina ke xepe mo levelinga i lok kapmek.

23 A sing ne Moroa i umsu mi limila, do neni na lox adadat lorooro atnimi la neni na lox alolos lodoxoma eburu mi lorooro la labantuxu atnimi, kusu minaba nemen mokmokso at lemeren ne Moroa ap mo laaleng Leeme Silok, ne Iesu Karisito nabamlong teren. 24 Moroa ga ro xaka nimi xusu neni na lox arooro nimi la levelinga ren i ruturun; neni xa naba lok mo levempanga at lorooro atnimi ngan ni ga tong alii vam i.

25 Luvutnetak mi luvurinuk. Mina sing ne Moroa xusu ni naba lok tooro nama. 26 Mina eseega rangarang mi lenetnes i xaala. 27 A tong i rinimi at lemeren Leeme Silok do mina exes na lovoang ti limixin axap at lotu.

28 Letaba nabalamu rinemi boro at Leeme Silok atdik, ne Iesu Karisito. I ruturun.